الأربعاء - 05 مايو 2021 - الساعة 11:19 م بتوقيت اليمن ،،،
مدى الثقافي/ سماح عادل*:
في مسلسل لعبة نيوتن ومن غير مايقصدوا قدموا نموذجين موجودين من نماذج الرجالة للأسف في مصر. حازم: غبي، عصبي، عامل فيها متمسك بالشرف والاخلاق، بيتعامل مع مراته على انها اقل وادنى، بيعاملها بسفالة وعصبية وبيهينها ويقلل من شأنها طول الوقت، رغم انه بيقول انه بيحبها ويخاف عليها، مابيعرفش يبقى حنون ولا مهتم ولا بيعرف يبين احترام وتقدير لمراته، عند اول فرصة صاحب واحدة من غير جواز، رغم انه لام على مراته وبهدلها بدعوى الشرف والفضيلة لما عرف انها عايشة في بيت مع راجل، يبقى الشرف والاخلاق بيتقاسوا على قد منظره كراجل قدام نفسه وقدام الناس، لكن هو يخالف قواعد الشرف والاخلاق عادي ويستغل امينة علشان يغيظ هنا.. ويعمل علاقة من غير جواز لكن مراته تتدبح وتتهان وتخسر حياتها وتبقى زبالة لو فكرت تحس انها انسانة وتميل لراجل تاني. ومع ذلك فيه ناس للاسف بتتعاطف معاه رغم تناقضاته وعدوانيته.
مؤنس: مراوغ، أناني، شهواني، بيستخدم الدين لمصالحه. بيتلون مية لون وبيستخدم الهدوء لكسب الناس لصالحه، اجبر هنا انها تتجوزه بلسانه ومعاملته التي تبان طيبة ، برضوا بيتعامل مع المراة بدونية وكأنها جزء من ممتلكاته، والفهم السائد للدين اللي بيحاول ينشره وهو غيره هو اللي بيخدم مصالحه كذكر.
فين بقى نموذج الرجل السوي، اللي بيتعامل مع المراة على إنها ند، وإنها شريك في العلاقة مش تابع، بيعرف يكون حنون وداعم وسند وضهر وأمان، بيعرف يكون ضعيف وقت ضعفه وقوي وقت قوته، شخص عادي كده مابيتاذيش وإن أذي بيتراجع ويعتذر ويعرف غلطه. أي مسلسل السنة دي طلع النموذج ده. مافييش لأنه مش موجود في الواقع المصري للأسف. يمكن كان فيه وخلص.. بس الصراحة الكائن الاسطورة ده ماظهرش على أيامنا. مالمحتوش في أي حتة خالص. مافيش غير النماذج غير السوية بس.
*كاتبة وناقدة فنية
